O ENTROIDO

Achéganse os días grandes do Entroido. Os carnavais ou entroidos galegos son a lenda viva, a historia de séculos contada cada febreiro para nenos e maiores, para paisanos e estranxeiros.
É unha explosión de cor, de fitas e flores, sobre o verde eterno da terra de Galicia. Un sonar de chocallos e cascabeis a través dos ventos que o mar arrastra. Un fluír de máscaras e personaxes que contan e cantan as historias e as actualidades da zona. É un constante sorprender e emocionar. Algo que non deberiamos deixar de coñecer e visitar, polo menos, unha vez na vida.

                       

De festa en festa e tiro porque me toca. Do roscón ás orellas, do Nadal ao Carnaval. Din que o Entroido, non é Entroido sen orellas. Álvaro Cunqueiro en “A Cociña Galega” comentaba: “Para martes lardeiro, aparte das filloas, fanse froles y orellas, con masa de fariña, ovos e leite...”.

Cantas ganas tiñamos de vos presentar esta receita, mais preferimos agardar a estas datas en que se achega o Entroido e polo tanto un dos mellores momentos do ano, gastronomicamente falando.

Chega a hora de nos pór a elaborar roscas, orellas, filloas etc., e o máis importante, chega o momento de desfrutar destes manxares galegos.

Como son un produto que se conserva ben, se facedes unha boa remesa delas, xa vos dá para todo o Entroido

ORELLAS

Ingredientes:

3 ovos

½ vaso de auga

½ vaso de leite

1 vaso de anís

100 gr de manteiga derretida

A raiadura dunha laranxa

½ culleriña de sal

1 cullerada de lévedo

800 gr de fariña

Elaboración:

Poñemos a fariña co sal nun recipiente amplo e incorporamos os líquidos, os ovos e os demais ingredientes.

Mestura todos os ingredientes ata conseguir unha pasta compacta que non se pegue nas mans.

Tápaa e déixaa repousar unha hora.

Despois colócaa nunha superficie con fariña e estira a masa o máximo posible, intentando que quede unha masa moi finiña.

Córtaa en forma triangular ou de orella de porco e bótaa nunha tixola con abundante aceite quente (se é posible, de oliva).

Cando estean douradas é que xa están listas.

Retíraas a unha fonte e bótalles azucre en po por riba.

Agardamos outras receitas típicas destes días